Egun Berdea

Egun Berdea izeneko ingurumen proiektua, hain zuzen, ingurumenaren aldeko jardunaldi bat da, eta ingurumenarekin lotutako jardueren egitarau osoa izaten du. Bertan, ikasleek zuhaitzak landatuko dituzte Iruñerrian eta bisita egingo dute Ezkirotzeko Naturalia Baserri Etxera, non taldearentzat bereziki prestatutako jarduerak gauzatuko dituzten.

Jarduera hau Nafarroako Kutxa Fundazioak antolatzen du Iruñeko zein Iruñerriko ikastetxeentzat, eta urtero egiten da, urtarriletik apirilera bitarte.

Ingurumenaren arloan sentsibilizatzearen garrantziaren jakitun da Nafarroako Kutxa Fundazioa, eta horregatik, partaidetzako eta borondatezko proiektu hau antolatzen du Lehen Hezkuntzako (bigarren ziklotik aurrera), Bigarren Hezkuntzako, Lanbide Heziketako Zikloetako, Unibertsitateko eta Heziketa Bereziko Zentroetako ikasleentzat. Gaztelaniaz zein euskaraz egin ahal izango da.

Jarduera programa zabal batez osatutako jardunaldia izango da, eta, besteak beste, ikasleek zuhaitzak landatuko dituzte Iruñerrian. Jardunaldia osatzeko, Ezkirotzeko Naturalia Baserri Etxera joango dira, hainbat jarduera zein tailer egitera.

Nafarroako Kutxa Fundazioak eskaintzen duen programak sei ordu inguru irauten du, eta ingurumen hezitzaileen tutoretzapean egiten da. Azken horiek, unitate didaktiko bat garatzeaz gain, materialak eta beharrezkoa den guztia prestatzen dute ikastetxeek ahalik eta gehien goza dezaten Nafarroako Kutxa Fundazioaren EGUN BERDEAZ.

 

Programa honako hau da, zehatz-mehatz:

• Landaketa. Hainbat fase ditu: azalpen teorikoa, paisaiaren interpretazioa eta hainbat espezieren landaketa (quercus robur eta quercus pubescens).

• Hamaiketakoa.

• Naturalia Baserri Etxea. Bertan, ingurumenarekin lotutako azalpen interaktiboak emango zaizkie eta gaiari buruzko sentsibilizazio jarduerak egingo dituzte, gure ingurunea eta haren zaintzaren garrantzia hobeto ulertu ahal izateko.

• Bazkaria.

 

Hainbat tailer egingo dira:

• Lorezaintza: Lorezaintzak erosotasuna ematen dio bizitzari, argia eta kolorea ematen diete gure kale zein plazei, eta urtaroen zikloa bizitzeko aukera ematen digu.

• Bioeraikuntza: Hormigoia, zementua, adreiluak... eraikuntzarako gure kontzientzian txertatuta ditugun elementu tradizionalak dira; alabaina, hiri ingurunean babestoki naturalen gabeziak nabarmen murritzarazi du gure parkeetan bizi eta habia egiten duten hegaztien kopurua.

• Domo Geodesikoa: Giza erabileretarako eraikuntza aukera bat dugu Domo Geodesikoa. Nahiko hitz konplexuak dira, baina horien atzean bestelako eraikuntza bat ezkutatzen da: eraikuntza iraunkorra; arintasun, gogortasun eta egokikortasun handikoa.

Giltzatako/txapa tailerra: Sortu zure giltzatako edo txapa berezia, material birziklatuak erabiliz.

* Eguraldiaren arabera, tailer batzuk ala beste batzuk egingo dira.

 

Jarduera guztiek lotura hertsia dute ingurumen iraunkortasuna lortzearekin, baliabideak erabiltzearekin eta horiek berritzearekin, ingurumenarekin oreka izatearekin eta ingurumena errespetatzearekin.

Jardunaldi honetan parte hartzeko, 35 ikasle izan behar dira gutxienez, eta 50 gehienez. Jarduera egiteko, bestalde, 3 € ordaindu beharko dira pertsonako.

Ikastetxeetako maila batek edo batzuek izena emateko eskaera egin nahi badute, izena emateko galdetegia bete beharko dute ezinbestean.

Informazio gehiago behar izanez gero, jarri gurekin harremanetan, honako helbide elektroniko honetara idatzita: diaverde@fundacioncajanavarra.es