Nafarroako Kutxa Fundazioak Ahaztutako Krisi Humanitarioetarako Funtsaren 2026ko ebazpena aurkeztu du gaur goizean. Ekitaldian izan dira José Ángel Andrés, Fundazioko presidentea; David Chimeno, Coopera GKEko zuzendaria; eta Annalisa Lenti, nazioarteko lankidetzako teknikaria eta Alboaneko proiektuaren arduraduna, Nafarroako komunikabide nagusietako ordezkariekin batera. Alboanek eta Coopera GKEk bultzatutako bi proiektu lagunduko ditu erakundeak 160.000 eurorekin.
Bere mintzaldian, Nafarroako Kutxa Fundazioko presidente José Ángel Andrések funtsaren zentzua eta irauteko bokazioa azpimarratu ditu: “Krisi humanitarioak ez dira desagertzen, gure bistatik bakarrik ateratzen dira”. Ildo horretan, nabarmendu du Fundazioak konpromisoa hartu duela arreta jartzeko komunikabideen fokuan egoteari utzi dioten baina oraindik ere laguntza eskatzen duten errealitateetan.
Bi proiektu, zaurgarritasun handiko testuinguruetan
Alboanen proiektua Far North eskualdean (Kamerun) garatuko da, indarkeriak, klima-aldaketaren inpaktuak eta lekualdatze behartuek markatutako testuinguruan. Errefuxiatuen, itzulitakoen eta harrera-komunitateen bizibideak eta inklusio ekonomikoa indartzea du helburu ekimenak.
Bestalde, Coopera GKEk “Argia ahanzturaren itzalean” proiektua sustatuko du Kayes eskualdean (Mali), eta ura, energia, elikadura eta gizarte-kohesioa ardatz dituen erantzun humanitario integrala eskainiko du, 500 familiari (3.500 pertsonari) mesede eginez.
Bi proiektuek ikuspegi bera dute: oinarrizko beharretan jardutea, jasangarritasuna sustatzea eta tokiko eta nazioarteko erakundeekin lankidetzan aritzea, epe ertain eta luzean eragina sortzeko.
Ikusten ez denari ikusgarritasuna ematea
2026ko deialdia “Ahaztezinak” komunikazio-proiektuarekin osatzen da. Proiektu horren helburua da kronifikatutako krisi humanitario horiei ikusgarritasuna ematea eta ahanztura instituzional eta mediatikoan eror ez daitezen lortzea.
Jose Angel Andresek azpimarratu zuen bezala, Fundazioak erakundeak eta komunikabideak konektatzen dituen eredu kolaboratibo baten alde egiten du errealitate hauek anplifikatzeko: “Ez dugu zarata iragankorra nahi, arreta esanguratsua baizik” .
Konpromiso iraunkorra
2018an sortu zenetik, Ahaztutako Krisietarako Funtsak Nafarroako Kutxa Fundazioak nazioarteko lankidetzarekin duen konpromisoa islatzen du, urtero bere aurrekontuaren %1,4 esparru horretara bideratuz.
Horrela, Fundazioak jarraitutasunez, erantzukizunez eta konpromisoz jarduteko borondatea berresten du, gizarte-erakundeekin eta komunikabideekin batera lan eginez, egoera bereziki ahulean dauden pertsonen bizi-baldintzak hobetzen laguntzeko.
